Месяца иулиа в 5-й день
На Малей вечерни, стихиры на 4, глас 1:
Подобен: Небесных чинов:
Стих: От стражи утренния до нощи, от стражи утренния, да уповает Израиль на Господа.
Стих: Яко у Господа милость, и многое у Него избавление, и Той избавит Израиля от всех беззаконий его.
Небесных чинов радование, и на земли человеков веселие, в наставшее ныне торжество честнаго обретения чудотворных мощей, во отцех великаго и преподобнаго Сергиа, того молитвами, Христе, спаси души наша.
Стих: Хвалите Господа вси языцы, похвалите Его вси людие.
Иже на небеси человека Божия, и на земли ангела суща с плотию, Богу от чрева матерня освященнаго блаженнаго Сергиа днесь наста обретение чудотворных мощей, и созывает все церковное исполнение, возсылати славу Христу Богу.
Стих: Яко утвердися милость Его на нас, и истина Господня пребывает во век.
Выспрь на небеси ангели радуются, и низу на земли человецы ликовствуют и Церковь Божия украшаема веселится о преславном пренесении честных мощей твоих, отче Сергие, Христу вопиющи: Ты ми держава, Христе, и утверждение.
Слава, глас 6:
Приидите, вси концы земнии радующеся, псалмы и песньми духовными, честное пренесение заступника нашего благочестне восхвалим, и обстояще честную его и чудотворную раку, на помощь того призываем, сице глаголюще: преблаженне отче, Сергие, даруй отечеству нашему и духовному стаду твоему твоими молитвами пособие на враги, и отечество миром огради, и воя его на сопротивныя укрепи, и спаси души наша.
И ныне, Богородичен:
Богородице, Ты еси лоза истинная, возрастившая нам Плод живота: Тебе молимся, молися Владычице, со святыми апостолы, помиловати души наша.
На стиховне стихиры, глас 2.
Подобен: Доме Евфрафов:
Дом Духа Пресвятаго был еси, отче: и нас молитвами твоими, вселение покажи Святей Троице, богомудре Сергие и пребогате.
Стих: Честна пред Господем смерть преподобных Его.
Приидите вернии радующеся, и внидем в церковь в веселии сердца, облобызающе честныя мощи Сергиа богомудраго, исцеление и грехов прощение приимем, молитвами его.
Стих: Блажен муж бояйся Господа, в заповедех Его восхощет зело.
Приими пение чад твоих, Сергие отче, и поющим обретение мощей твоих, и любящим тя, подавай еже на пользу прошение.
Слава, и ныне, Богородичен: глас и подобен тойже:
Вышнии лицы, Богородице Дево, поют с нижними, славяще непрестанно Рождество Твое пречистое.
Тропарь, глас 8:
От юности восприял еси Христа в души твоей, преподобне, и паче всего вожделел еси мирскаго мятежа уклонитися: мужески в пустыню вселился еси, и чада послушаша в ней, плоды смирения возрастил еси. Тем быв Троице вселение, чудесы твоими всех просветил еси, приходящих к тебе верою, и исцеления всем подая обильно: отче наш Сергие, моли Христа Бога, да спасет души наша.
Слава, и ныне:
Иже нас ради рождейся от Девы, и распятие претерпев Благий, испровергий смертию смерть, и воскресение явлей яко Бог, не презри яже создал еси рукою Твоею: яви человеколюбие Твое Милостиве, приими рождшую Тя Богородицу молящуюся за ны: и спаси Спасе наш, люди отчаянныя.
На Велицей вечерни, на Господи, воззвах, стихиры на 8, глас 4.
Подобен: Званный свыше:
Стих: Из глубины воззвах к Тебе Господи, Господи, услыши глас мой.
Стих: Да будут уши Твои, внемлюще гласу моления моего.
Егда прежде рождества твоего, прииде заченшая тя в церковь Божию, тогда во чреве ея трикраты возгласил еси, Троицу прославляя, богомудре отче Сергие. Прежде мирскаго познания Бога познал еси, паче же Богом познан был еси, преблаженне, проявляя всем хотящая быти на тебе, Божия благодати сияние, и светлостьми лица твоего, показуя душевную и телесную чистоту, еяже ради избранный сосуд быв Христа Бога нашего: Егоже моли, спасти и просветити души наша.
Стих: Аще беззакония назриши Господи, Господи, кто постоит? Яко у Тебе очищение есть.
Стих: Имене ради Твоего, потерпех Тя Господи, потерпе душа моя в слово Твое, упова душа моя на Господа.
Егда Божие рачение найде на тя, богомудре и всеблаженне отче Сергие, тогда вся сущая в мире преобидел еси, и Христа единаго от души возлюбив, и Того живоносным стопам последуя, пустыню достигл еси: и сию насеяв семенем трудов твоих, и напоив тучами слез твоих, умножил еси плоды добродетелей: и теми напитав чада, привел еси я Христу Богу. Егоже моли, спасти и просветити души наша.
Стих: От стражи утренния до нощи, от стражи утренния, да уповает Израиль на Господа.
Стих: Яко у Господа милость, и многое у Него избавление, и Той избавит Израиля от всех беззаконий его.
Егда Божественный глас услышал еси, богомудре, глаголющ ти: се Пречистая грядет: тогда во мнозе подвизе прилежне молился еси, яко да сподобишися онаго страшнаго посещения. И абие пресветлый паче солнца свет осия тя, преподобне, и Владычицу Богоматерь разумныма и телесныма очима видети сподобился еси, и Тоя сладкий глас ушима внушил еси реченный: неотступна буду от места сего, и не имать оскудети обитель твоя: Юже моли, спасти и просветити души наша.
Стих: Хвалите Господа вси языцы, похвалите Его вси людие.
Стих: Яко утвердися милость Его на нас, и истина Господня пребывает во век.
Егда приспе время еже к Богу отшествия твоего, тогда яко звезда пресветлая востекл еси в небесныя обители, и тамо с лики святых престолу Единосущныя Троицы предстоиши: блаженное же и честное тело твое, на многа лета землею покровено бывшее, ныне от земли издавшеся чудес зарю испущает, чтущим обретение твое, богомудре Сергие. Отечеству нашему на сопротивныя победы даруй, и всем верным грехов прощение испроси у Христа Бога нашего: Егоже моли, спасти и просветити души наша.
Слава, глас 8:
Приидите, вси вернии Российстии собори, и насладимся нынешняго светлаго торжества, приидите священных исполнение, и монахов сословие, и видите, како Церковь Божия украшается, псалмы и песньми и пеньми духовными исполняема: честная же и славная обитель богоблаженнаго отца Сергиа веселия и радости исполняема: во обретении честных мощей его, хвалящися вселенную созывает радостно вопити Господеви: Ты даровал еси, Владыко Христе, отечеству нашему крепкаго воина, и непобедимое оружие на невидимыя и видимыя враги, и христоименитым людем сокровище неистощимо неисчерпаемых дарований. Того молитвами подаждь душам нашим велию милость.
И ныне, Богородичен, глас тойже:
Царь Небесный за человеколюбие на земли явися, и с человеки поживе: от Девы бо Чистыя плоть приемый, и из Нея прошедый с восприятием: един есть Сын, сугуб естеством, но не ипостасию. Темже совершенна Того Бога, и совершенна Человека воистинну проповедающе, исповедуем Христа Бога нашего: Егоже моли Мати Безневестная, помиловатися душам нашим.
Вход. Чтения.
Притчей чтение.
[Глава 10] Память праведнаго с похвалами, и благословение Господне на главе его. Блажен человек, иже обрете премудрость: и смертен, иже уведе разум. Лучше бо сию куповати, нежели злата и сребра сокровища. Честнейшая же есть камений многоценных: все же честное недостойно ея есть. Долгота бо дней, и лета живота в деснице ея: в шуице же ея богатство и слава: от уст ея исходит правда, закон же и милость на языце носит. Послушайте убо мене, о чада! честная бо реку: и блажен человек, иже пути моя сохранит: исходи бо мои, исходи живота, и уготовляется хотение от Господа. Сего ради молю вас, и предлагаю мой глас сыновом человеческим: яко аз премудрость устроих, совет и разум и смысл аз призвах. Мой совет и утверждение, мой разум, моя же крепость. Аз мене любящия люблю, ищущии же мене обрящут благодать. Разумейте убо, незлобивии, коварство, ненаказаннии же, прилагайте сердца. Послушайте мене и паки, честная бо реку: и отверзу от устен правая, яко истине поучится гортань мой, мерзски же предо мною устны лживыя. С правдою вси глаголы уст моих: ничтоже в них стропотно, ниже развращенно. Вся права суть разумевающим, и проста обретающим разум. Научаю бо вас истине, да будет о Господе надежда ваша, и исполнитеся духа.
Притчей чтение.
[Глава 10] Уста праведнаго каплют премудрость, язык же неправеднаго погибнет. Устне мужей праведных каплют благодати, уста же нечестивых развращаются. Мерила льстивая, мерзость пред Господем, вес же праведный приятен Ему. Идеже аще внидет досаждение, тамо и безчестие: уста же смиренных поучаются премудрости. Совершение правых наставит их, и поползновение отрицающихся упасет их. Не пользуют имения в день ярости, правда же избавит от смерти. Умер праведный, остави раскаяние: наручна же бывает и посмеятельна нечестивых пагуба. Правда непорочнаго исправляет пути, в нечестие же падает неправда. Правда мужей правых избавит их: безсоветием же пленяются беззаконнии. Скончавшуся мужу праведну, не погибнет надежда: похвала же нечестивых погибнет. Праведник от лова убегнет, в негоже место предается нечестивый. Во устех нечестивых сеть гражданом, чувство же праведных благоспешное. Во благих праведных исправится град, и в погибели нечестивых радование. Во благословении правых возвысится град, усты же нечестивых раскопается. Ругается гражданом лишенный разума, муж же мудрый безмолвие водит.
Премудрости Соломони чтение.
[Глава 3] Праведных души в руце Божией, и не прикоснется их мука. Непщевани быша во очесех безумных умрети, и вменися озлобление исход их: и еже от нас шествие, сокрушение, они же суть в мире. Ибо пред лицем человеческим аще и муку приимут, упование их безсмертия исполнено, и вмале наказани бывше, великими благодетельствовани будут: яко Бог искуси я, и обрете их достойны Себе. Яко злато в горниле искуси их, и яко всеплодие жертвенное прият я. И во время посещения их возсияют, и яко искры по стеблию потекут. Судят языком, и обладают людьми, и воцарится Господь в них во веки. Надеющиися Нань разумеют истину, и вернии в любви пребудут Ему: яко благодать и милость в преподобных Его, и посещение во избранных Его.
На литии стихиры, глас 6:
Приидите, празднолюбцы и постников сословие, верою сошедшеся, истиннаго постника почтим днесь Сергиа, с веселием шествовавшаго по стопам Владыки своего узкий путь, и безстрастную жизнь, и верою возопиим: О всеблаженне! преподобным сожителю, и постником похвало, о нас молися ко Господу, помиловатися душам нашим.
Преподобне и богоносе Сергие, любве ради Христовы вся оставил еси, и в пустыню вшед, никакоже убоялся еси невидимых враг коварствия: аще бо и многажды приидоша на тя, скрежетанием зубным ярость показующе, ты же молитвами твоими, яко дым без вести сих сотворил еси. О непорочныя твоея души, и крепкаго терпения твоего! Христа непрестанно моли спастися душам нашим.
Российская убо всеосвященная, и великая Церковь, с православными люди, монаси же и простии, евангельских источник струями напоившеся, духовно веселимся, в нарочитом празднице, добраго пастыря и учителя, и целебныя его мощи обстояще любезно облобызаем, и сих яко цветы песньми и хвалами увязем, рекуще: радуйся, Сергие блаженне, небесный человече, земный ангеле, и Духа Святаго обитель: радуйся, яко многих ко спасительному пути наставил еси: радуйся, воинству нашему похвала и утверждение, преподобне Сергие богоприятне, отечеству твоему пресветлый светильниче, и молитвенниче о душах наших.
Глас 1:
Приидите, священных собори, и православных исполнение, приидите монахов совокупление, и внидем радующеся в церковь Бога нашего, и чудотворную раку преподобнаго отца Сергиа обымем радостно, яко чудес сокровище неизъемлемо: и честныя его мощи любовию лобызающе, различных недуг свободимся, и душам спасение приимем, вопиюще ему: о всеблаженне отче Сергие! Моли преблагаго Бога нашего, даровати пособие на враги отечеству нашему, и спасти души наша.
Днесь веселится небо свыше, и земля радуется с человеки, и да ликовствуют новоизбраннии Российстии собори, и светло торжествуют монашеская совокупления: святая же Церковь Божия, и дивная в правду, яко пресветлыми зарями просвещаема, многих чудес наполняющися от честных и многоцелебных мощей преподобнаго отца Сергиа, всю вселенную созывает похвалити подвиги его. Тем вси сошедшеся, того обретение в песнех и пениих весело празднующии, воспоем Христа Бога нашего, да подаст нам молитвами его мир и велию милость.
Наста днесь светлое торжество пренесения мощей богоблаженнаго отца Сергиа: приидите, вси вернии, Церковь Божию песньми венчаем, и в ней прославим в Троице певаемаго Христа Бога нашего, вопиюще и глаголюще: Ты даровал еси, Владыко Христе, Твоего угодника граду нашему Москве твердую стену, и всем Российским странам крепкаго предстателя показал еси, и христоименитым людем таковаго чудесоподателя, и неисцельных недуг целителя, и бесовом прогонителя, и молитвенника о душах наших.
Слава, глас 6:
Приидите, монашествующих множество днесь, Сергиа, благочестия подражателя, песньми и пеньми восхвалим, и честную его и многоцелебную раку обстояще, любезно облобызаем, глаголюще: радуйся, преславне Сергие, отечеству твоему пресветлый светильниче: радуйся, яко чисте Чистейшему Свету совокуплься: радуйся, яко Троице предстоиши со ангелы, Юже непрестанно моли, даровати душам нашим велию милость.
И ныне, Богородичен:
Творец и Избавитель мой, Пречистая, Христос Господь, из Твоих ложесн прошед, в мя оболкийся, первыя клятвы Адама свободи. Темже Ти Всечистая, яко Божии Матери же и Деве воистинну, вопием немолчно: радуйся ангельски, радуйся Владычице, предстательство и покрове, и спасение душ наших.
На стиховне стихиры, глас 4:
Подобен: Дал еси знамение:
Дал еси украшение Церкви Твоей, Господи, честныя и многоцелебныя мощи преподобнаго Сергиа Твоего угодника: и яко утварь царскую имущи красуется, и яко венец пресветлый носящи веселится, созывающи своя чада, ихже водою и Духом евангельски породи. Темже Твое человеколюбное смотрение славим, Иисусе Человеколюбче, и Спасе душ наших.
Стих: Честна пред Господем смерть преподобных Его.
Дал еси державу необориму царствующему граду Москве, Господи, и всем Российским странам утверждение: честней же обители Твоей твердое укрепление и стену непоколебиму, цельбоносныя и святыя мощи преблаженнаго Сергиа Твоего рачителя. Тем Твоя человеколюбныя щедроты славим, Иисусе Всесильне, и Спасе душ наших.
Стих: Блажен муж бояйся Господа, в заповедех Его восхощет зело.
Дал еси Российскому отечеству, Господи, твердое защищение, и оружие спасения, и воем его великое на сопротивныя одоление, святителем же честное украшение, и всем болящим врачевство безмездно, святыя мощи преподобнаго и треблаженнаго Сергиа, ихже ныне радостно облобызаем, исцеления различная приемлюще, Твое неизреченное милосердие славим, Иисусе Благосерде, и Спасе душ наших.
Слава, глас 8:
Монахов множества наставника тя почитаем, отче наш Сергие: твоею бо стезею воистинну право ходити познахом. Блажен еси Христу работав, и вражию обличил еси силу, ангелов собеседниче, преподобных сопричастниче и праведных: с нимиже молися Господеви, помиловатися душам нашим.
И ныне, Богородичен:
Безневестная Дево, Яже Бога неизреченно заченши плотию, Мати Бога Вышняго, Твоих рабов мольбы приими Всенепорочная, всем подающи очищение прегрешений: ныне наша моления приемлющи, моли спастися всем нам.
На благословении хлебов тропарь, глас 8:
От юности восприял еси Христа в души твоей, преподобне, и паче всего вожделел еси мирскаго мятежа уклонитися: мужески в пустыню вселился еси, и чада послушаша в ней, плоды смирения возрастил еси. Тем быв Троице вселение, чудесы твоими всех просветил еси, приходящих к тебе верою, и исцеления всем подая обильно: отче наш Сергие, моли Христа Бога, да спасет души наша.